मी खेळलेली रंगपंचमी – मराठी निबंध • Mi Khelaleli RangPanchami Nibandh Marathi •

रंगपंचमी हा रंगांचा उत्सव अत्यंत उत्साहात आणि जल्लोषात साजरा केला जातो. यावर्षी देखील आम्ही रंगपंचमी अगदी मनमुराद खेळलो. रंगपंचमी यायच्या अगोदर आठवडाभर तरी माझ्या मनात रंगपंचमीच्या प्रंसगांचे चित्र रेंगाळत होते.

यावर्षी रंगपंचमी रविवारी असल्याने शाळेला साहजिकच सुट्टी होती. दिवस सुरू होताच माझ्या भावाने मला नकळत अंथरुणातच रंग लावायला सुरुवात केली. मी खाडकन जागा झालो आणि पळतच बाहेर गेलो. मी ही त्याला कसा रंग लावायचा हा विचार करू लागलो.

काही वेळाने अंघोळ करून झाल्यावर मी जुनी कपडे परिधान केली. आज फक्त रंगच रंग, या कल्पनेने मी नुसता भारावून गेलो होतो. दुकानात पळतच जाऊन मी सर्व प्रकारचे रंग विकत घेऊन आलो आणि सर्वप्रथम मी माझ्या भावाला रंगवले.

आमच्या शेजारील गल्लीत मुले गाणी वाजवून आणि पाणी उडवून रंगपंचमी खेळत होते. मी आणि माझे मित्र त्यामध्ये सामील होऊन उड्या मारतच रंगपंचमी खेळलो. तेथे खेळताना नाच, पडापडी, धक्काबुक्की अशी सर्व प्रकारची मस्ती आम्ही केली.

मी दुपारी घरी जेवायला आलो आणि त्यानंतर माझी झोपच लागली. झोपून उठलो आणि बघतो तर काय, घड्याळात चार वाजले होते. आता ऊन जास्त नसल्याने मला रंग खेळण्यासाठी पुन्हा एकदा परवानगी मिळणारच होती.

मी आता आमच्या वर्गातील मुलांच्या घरी जाऊन त्यांना रंग लावण्याचे ठरवले. मी सर्वांना नकळत रंग लावण्यात यशस्वी ठरलो देखील, पण त्यांना रंग लावून झाल्यावर मला लवकर निसटता आले नाही आणि मी सापडलो. मला केतनने पकडले आणि सर्वांनी मिळून जवळजवळ मला रंग चारलाच!

माघारी आल्यावर मला घरी खूप बोल खावा लागला. पहिल्या अंघोळीत माझा रंग तर निघालाच नाही शिवाय दुसऱ्या दिवशी अंघोळ करून देखील माझा चेहरा हा रंगीबेरंगीच दिसत होता. यावर्षीची रंगपंचमी ही माझ्या चांगलीच लक्षात राहण्यासारखी होती.

रंगपंचमी खेळताना मिळणाऱ्या आनंदाचे वर्णन हे कधीच होऊ शकत नाही. आपला स्व बाजूला ठेऊन आपण एकमेकांच्या रंगांत रंगून जात असतो. आपण इतरांना रंग लावतोच पण आपल्यालाही कोणीतरी रंग लावावा असे मनोमन वाटत असते. अशा एक अनेक कारणांनी रंगपंचमी मला खूप आवडते.

तुम्हाला मी खेळलेली रंगपंचमी हा मराठी निबंध (Mi Khelaleli RangPanchami Nibandh Marathi) आवडला असल्यास नक्की तुमचा अभिप्राय कमेंट बॉक्समध्ये कळवा…

The post मी खेळलेली रंगपंचमी – मराठी निबंध • Mi Khelaleli RangPanchami appeared first on Daily Marathi News.

रंगपंचमी मराठी निबंध क्र. १ (३०० शब्द) | Rangpanchami Essay In Marathi |

होळी, धुलवड आणि रंगपंचमी हे सण महाराष्ट्रात विविध दिवशी साजरे केले जातात. त्यातील रंगपंचमी हा दिवस म्हणजे रंगांचे, विविधरंगी जीवनाचे आणि आनंदाचे प्रतिकच आहे. या दिवशी सर्वजण पिचकारी, रंगांनी भरलेले फुगे, कोरडे रंग आणि रासायनिक रंग वापरून रंगपंचमी साजरी करतात.

रंगपंचमीला खूप पौराणिक संदर्भ आहे. भगवान श्री कृष्ण हे स्वतः रंगपंचमी खेळतात, असे वर्णन आहे. गोपिकांना रंग लावणे आणि त्यांना त्रास देणे हा एक प्रकारे खेळच त्यांनी खेळला होता. राधा व कृष्ण हे प्रतिक स्वरूप म्हणूनच रंगपंचमीला पुजले जातात.

हिंदी आणि मराठी चित्रपटात अनेकवेळा होळीची, रंगपंचमीची दृश्ये दाखवली जातात. त्यावर नृत्यसंगीताचा आविष्कार दाखवला जातो. प्रत्येक पिढीत एखादे तरी गाणे सुप्रसिद्ध होत असते. ऐन रंगपंचमीला एखादा चित्रपट प्रदर्शित होणार असेल तर अशी गाणी हमखास चित्रित केली जातात.

प्रत्येक पिढीसाठी रंगपंचमी हा सण वेगवेगळा असू शकतो. शाळेतील मुले, लहान मुले ही धावत पळत, पिचकारी घेऊन, रंग संपले तर पाणी देखील एकमेकांवर ओतून हा सण साजरा करतात. महाविद्यालयीन मुले-मुली कोरड्या रंगांचा वापर करणे जास्त पसंत करतात.

आज मोबाईल आणि सोशल मीडियाचा वाढता वापर पाहता रंगपंचमी हा सण देखील सोशल झाला आहे. वास्तविक खेळण्याचा आनंद मिळेल की नाही ते माहीत नाही पण स्टेटस मात्र महत्त्वपूर्ण झाला आहे. त्यासाठी रंगांची दोन बोटे गालावर उठवून खूप लोक मस्तपैकी फोटो अपलोड करत राहतात.

रासायनिक रंग हे त्वचेसाठी हानिकारक ठरू शकतात त्यासाठी आपण कोणत्या प्रकारचा रंग वापरतो, त्याची काळजी घेणे आवश्यक आहे. बाजारात खूप प्रकारचे रंग उपलब्ध असतात. नैसर्गिक पद्धतीने, कोणतेही रसायन न वापरता बनवलेले रंग सर्वांनाच उपयुक्त ठरतील आणि त्यांचा मानवी आरोग्यावर काहीही परिणाम होणार नाही.

रंगपंचमी हा खेळ महाराष्ट्रात होळीनंतर पाचव्या दिवशी खेळला जातो. काही ठिकाणी याची पहिल्या दिवसापासूनच सुरुवात होते. असे असले तरी सर्वत्र मांगल्याचे, उत्सवाचे वातावरण मात्र असते. रंग खेळणे हा अति संवेदनशील मनाला भुरळ घालणारा सण आहे.

रंगपंचमी दिवशी कोणीही कोणाला रंग लावला तरी चालते. त्या दिवशी वाईट वाटून घ्यायचे नसते. एकमेकांचा रंग प्रिय व्यक्तींवर बरसला पाहिजे आणि त्यामुळे आनंद व उल्हास हा प्रत्येक वर्षी वाढत गेला पाहिजे अशी त्यामागची भावना असते.

रंगपंचमी मराठी निबंध क्र. २ (२०० शब्द) | Rangpanchami Nibandh Marathi |

होळी, धुलिवंदन आणि रंगपंचमी हे भारतीय परंपरेनुसार उत्सवाचे दिवस आहेत. सध्या रंगपंचमी व होळी हे सण एकत्रच साजरे केले जात आहेत परंतु महाराष्ट्रात रंगपंचमी हा प्रत्येक वर्षी होळीच्या पाचव्या दिवशी म्हणजेच फाल्गुन वद्य पंचमीला साजरा केला जाणारा उत्सव आहे. उत्तर भारतात आणि मोठमोठ्या शहरांत होळीच्या दुसऱ्या दिवसापासून रंगपंचमी खेळायला सुरुवात केली जाते.

भारतात रंगपंचमी हा सण अत्यंत प्राचीन काळापासून खेळत असल्याची अनेक ठिकाणी नोंद आहे. रूढी परंपरेनुसार रंगपंचमी हा सण रंगांनी खेळला जातो आणि त्याची परंपरा पूर्वीपासून अखंडपणे सुरू आहे. रंगपंचमी हा सण जवळ येताच प्रत्येकाला रंगांची आणि रंगांच्या खेळातून मिळणाऱ्या आनंदाची उत्सुकता लागून राहते.

रंगपंचमीला प्रत्येकाचे नातेवाईक आणि मित्रमंडळी असे सर्वजण मिळून रंग खेळतात. लहान मुले तर रंगपंचमी येण्याअगोदरच विविध रंग, छोट्या मोठ्या पिचकाऱ्या, फुगे इत्यादी बाबी जमवून ठेवतात आणि रंगपंचमी दिवशी धावत – पळत, लपत – छपत एकमेकांना रंग लावतात.

लहान मुलांना ओल्या रंगांनी खेळायला खूप आवडते तर तरुण मुले-मुली कोरड्या आणि नैसर्गिक रंगाने रंग खेळतात. सध्या मोबाईल आणि इंटरनेट उपलब्ध असल्याने सर्वत्र सोशल मीडियावरून रंगपंचमीच्या शुभेच्छा दिल्या जातात. सर्व लोक स्टेटस ठेवून रंगपंचमी खेळल्याचे सर्व मित्रपरिवारात कळवतात.

सध्या काही ठिकाणी रासायनिक रंग वापरले जातात. ते शरीरास आणि डोळ्यांस घातक असल्याने तशा रंगांचा वापर टाळायला हवा. तसेच ओले रंग खेळताना पाण्याचा अतिवापर देखील टाळणे गरजेचे आहे. कोणालाही ईजा होईल अथवा त्रास होईल अशा अयोग्य रितीने रंगपंचमी खेळणे टाळावे.

रंगपंचमीला सर्व भेदभाव विसरून देऊन आपण सर्व एकच आहोत अशा भावनेने एकमेकांना रंग लावला जातो. प्रत्येकाच्या रंगाला आपण आपल्या अंगावर लावून घेणे म्हणजेच आपण त्याला आपलेसे मानले असल्याची प्रचिती होत असते. त्यामुळे सर्वांनी उदासी बाजूला ठेवून अत्यंत उत्साहीपणे रंगपंचमी साजरी करायला हवी.

संपूर्ण निबंध वाचल्याबद्दल धन्यवाद! तुम्हाला रंगपंचमी हा मराठी निबंध (Rangpanchami Marathi Nibandh) आवडला असल्यास नक्की तुमचा अभिप्राय कमेंट बॉक्समध्ये कळवा…

The post रंगपंचमी – मराठी निबंध | Rangpanchami Marathi Nibandh | appeared first on Daily Marathi News.